Si Gobernador Peter Unabia ng Misamis Oriental ang pinakabagong kandidato na pinagpadalhan ng Show Cause Order (SCO) ng Commission on Elections (Comelec) dahil sa kanyang mga naging pahayag sa isang kampanyang sortie.
Ipinadala ng Comelec ang kautusan noong Lunes, kung saan hinihingan si Unabia—na muling tumatakbo sa Eleksyon 2025—na ipaliwanag kung bakit hindi siya dapat i-disqualify matapos sabihing ang mga nursing scholarship ay dapat lamang ipagkaloob sa mga “magagandang” babae.
Binatikos din si Unabia dahil sa kanyang mga sinabi tungkol sa komunidad ng mga Muslim, bagamat walang direktang sipi na inilabas hinggil dito.
“In view of the foregoing, you are hereby ordered to show cause in writing within a non-extendible period of three days from receipt hereof and to explain why a complaint for election offense and/or a petition for disqualification should not be filed against you,” ayon sa nakasaad sa kautusan.
Dagdag pa nito, “Failure on your part to comply with this Order shall be construed a waiver of your right to be heard and the filing of the appropriate case against you.”
Sa isang video na naging viral, maririnig si Unabia na nagsasabing:
“Ang nursing ay para lang sa mga babae, hindi sa mga lalake. Pero dapat, magandang babae.”
Ipinaliwanag pa niya sa Cebuano:
“Hindi pwede ang pangit kasi kapag maysakit ang lalake tapos haharap ang pangit na nurse, mas lalong magkakasakit.”
Noong nakaraang linggo, naglabas din ng show cause order ang Comelec laban kay Atty. Christian Sia, na tumatakbo bilang kinatawan ng nag-iisang distrito ng Pasig, dahil sa kanyang mga “biro” ukol sa mga single mothers sa isang campaign rally.
