MANILA, Philippines — Mahigit 50,000 senior citizen ang patuloy na nakikinabang sa Blu Card program ng Makati na nag-aalok ng mga benepisyo upang mapahusay ang kanilang kalidad ng buhay, ayon kay Mayor Abby Binay nitong Martes.
Noong Setyembre 18, higit sa 38,000 Blu Card holders ang nakatanggap na ng kanilang mid-year cash incentives na nagkakahalaga ng P71.8 milyon, na direktang ipinadala sa kanilang mga GCash account.
Nagbibigay ang programa ng cash incentives dalawang beses sa isang taon, kung saan ang mga senior edad 60-69 ay nakakatanggap ng P1,500; P2,000 para sa edad 70-79, at P2,500 para sa edad 80-89.
Ang mga seniors na edad 90 pataas ay tumatanggap ng P5,000, habang ang mga centenarian na Blu Card holders ng limang taon o higit pa ay binibigyan ng P5,000.
Patuloy ding nagbibigay ang pamahalaang lungsod ng Makati ng iba pang mga benepisyo gaya ng libreng panonood ng pelikula, na nagpapahintulot sa mga matatanda na manood ng hanggang tatlong pelikula araw-araw.
Bukod dito, 22,100 na birthday cakes ang naihatid sa mga senior na nagdiwang ng kanilang kaarawan ngayong taon, at 3,256 naman ang nakatanggap ng libreng serbisyo sa salon.
Upang mapanatiling aktibo ang mga senior, inilunsad ng Makati ang programang “Lakbay Saya” na nag-aalok ng libreng paglalakbay sa mga sikat na destinasyon sa buong bansa.
Nagbigay rin ang lungsod ng 64 na wheelchair, 56 reclining wheelchair, at iba pang mga aparatong pantulong upang suportahan ang mga matatandang residente.
Sakop rin ng programa ang serbisyong pangkalusugan, kung saan ang Yellow Card program ay nagbibigay ng libreng konsultasyon, gamot, at bakuna.
Ang walang limitasyong dialysis at pangangalaga sa mga may malubhang sakit ay magagamit din ng mga senior na mayroong chronic illness.
Ayon kay Binay, ang mga pangangailangan sa kalusugan ng mga senior citizen ay isa sa mga pangunahing prayoridad ng lungsod.
“It has always been one of our goals to ensure that they are not only happy, but healthy and cared for,” ani Binay.
