Isang pribadong paaralan sa Davao City ang pansamantalang lumipat sa online learning dahil sa posibleng banta ng hand, foot, and mouth disease (HFMD).
Ang Ateneo de Davao University Grade School ay lumipat sa online learning upang maisagawa ang mga sanitation protocols. Aabisuhan ang mga magulang kapag magpapatuloy na ang face-to-face classes.
Hinimok din ng administrasyon ng paaralan ang mga estudyante na maghugas ng kamay nang regular. Ang paghuhugas ng kamay ay mahigpit na ipinapatupad din sa Maa Central Elementary School bago at pagkatapos ng klase dahil sa banta ng HFMD.
“Pagdating pa lang sa eskwelahan, tinuturuan na namin ang mga bata na pumunta sa washing area at maghugas ng kanilang mga kamay, habang kumakanta ng birthday song,” sabi ni Jonathan Caminade (in visaya), Communication Focal Person ng Maa Central Elementary School.
Ang HFMD ay dulot ng isang virus mula sa enterovirus family na kadalasang nakakaapekto sa mga bata. Kabilang sa mga sintomas ng HFMD ay ang pagkakaroon ng mga pulang batik sa bibig, kamay, at paa; pananakit ng lalamunan; pagkapagod; at kawalan ng gana sa pagkain.
Ayon sa US Centers for Disease Control and Prevention (US CDC), ang HFMD ay naipapasa sa pamamagitan ng pakikipag-ugnayan sa ibang tao, mga respiratory droplets, at paghawak sa mga kontaminadong bagay.
Ayon sa City Health Office (CHO), ang paggamot ay nakadepende sa mga sintomas. Ang paggaling ay maaaring magsimula sa ikapitong araw hanggang ika-14 na araw matapos makuha ang virus.
Ang HFMD ay maaaring maiwasan sa pamamagitan ng madalas na paghuhugas ng kamay, pagpapanatili ng kalinisan sa kapaligiran, pagdidisimpekta, at pag-iwas sa pakikipag-ugnayan sa mga may sakit.
